Matud pa ni Mr. Gualberto Laput, ang Information Consultant ug Spokesperson sa ZANECO nga kini lakip sa mga kalihukan sa pagsaulog sa ika-40 ka tuig nga pagkahimugso sa ZANECO karong bag-o.
Dugang pa ni Laput nga ang therma marine usa ka independent power producer, diin nagsugod ug palit ug kuryente ang ZANECO ilawum sa pagdumala ni General Manager Adelmo Laput, kaniadtong bulan sa Pebrero niining tuiga.
Niini, ilang gipangutana ang maong kompaniya kung unsa usab ang matabang niini sa komunidad, ug kini mipasalig nga sila mopatuman ug mga programa lakip na ang ZANECO sa ilang social services ug mipasalig nga mohatag ug napulo ka computer set.
Si Laput ang nagkanayon usab nga ang ZANECO dili kini mamahimong modawat sa mga donasyon gikan sa therma marine maoy hinungdan nga ang Polanco National High School maoy napilian nga maoy resipiente sa maong computer sets.
Unang gihatag sa maong tulunghaan ang lima ka computer set ug isunod ang laing lima sa dili na madugay.
Human usab sa unom ka bulan, mohatag na usab ang maong kompaniya sa laing computer sets diin gilaraw sa ZANECO didto na usab sa third district nga ubos pa sa maong kooperatiba.
Ang pagturn-over sa maong computer set gitambungan usab kini ni Director Milagros Estabillo Quinahon sa National Electrification Administration, kinsa mao usay pinasidunggang dinapit atul sa pagsaulog sa ika 40 ka tuig nga kasumaran sa ZANECO ug gitambungan sa mga kawani sa tanang sub-stations sa ZANECO dinhi sa Zamboanga del Norte.
Gihimo usab ang Sandurot Festival nga gisugdan kaniadtong Dominggo, Agosto 19 diin adunay nagkalain-laing kalihukan ang gipahigayon sa Pinan Sub-Station.
Si Laput ang mipasabot nga ang anibersaryo sa ZANECO gihimo kini sa lungsod sa Pinan, sanglit dinhi unang natukod ang maong kooperatiba tungod kay ang Dipolog, ilawum pa kini sa VECO kon Visayan Electric Cooperative.
MARDY D. LIBRES